Parlamentdə ucuz şou: Deputatların "odlu-alovlu" populizmi

Milli Məclisin ötən gün keçirilən plenar iclasında "Dövlət Sosial Müdafiə Fondunun 2025-ci il büdcəsi haqqında" qanun layihəsi ətrafında "qızğın" müzakirələr gedib.

Hətta deputatlardan bəziləri o qədər "odlu-alovlu" çıxış ediblər ki, parlamentin spikeri Sahibə Qafarova onlara müdaxilə etməyi özünə borc bilib.

Məsələnin kökündə isə heç də deputat fəaliyyətinin zərurətləri dayanmayıb, mahiyyət tamamilə süni populizm olub ki, "odlu-alovlu" çıxış edən deputatlarımız da bununla özlərinə xal qazanmaq istəyiblər.

Siyavuş Novruzov, Səyyad Aran və Jalə Əliyeva öz çıxışlarında cəmiyyətdə çaxnaşma yaradacaq təhlükəli "tezis"lər irəli sürüblər. Burada təhlükəli "tezis" dedikdə deputatların fakta söykənməyən, təhrif olunmuş məlumatları və heç bir halda məqsədi xalqa xidmət olmayan populist fikirləri nəzərdə tutulur.

Elə Siyavuş Novruzovun sosial şəbəkələrdə paylaşılmaq üçün və özündən qəhrəman yaratmağa hesablanmış çıxışına ən yaxşı cavabı nazir Sahil Babayev verib:

"Araşdırmamış heç kim heç nə deməsin".

Əgər nazir deputata bu sözü deyirsə, demək ki, məsələnin kökündə heç də xalqın hansısa probleminə can yandırmaq dayanmır. Burada mövzu heç də xalqın problemi, xalqın hansısa probleminin həll yolunu tapmaq deyil, mövzu, sadəcə, süni şou yaratmaq və pafosu həqiqətdən ayıra bilməyən kütləyə xitab etməkdir.

Bu isə öz növbəsində olduqca təhlükəli və yolverilməz tendensiyadır. Çünki deputatın vəzifəsi xalqı təmsil etmək və qanunvericilik müstəvisində onun maraqlarının qorunmasını təmin etməkdir. Öz maraqları naminə xalqı yanıltmaq və buna səbəb olacaq fikirləri irəli sürmək, məramı xoş olmayan ideyaları ortaya atmaq ən yüngül halda deputat adına yaraşmayan bir səhvdir.

Sadalanan deputatların araşdırılmamış fikirləri onların, əslində, öz vəzifə və öhdəliklərinə yanaşmasını göstərir. Əgər onların iddia etdikləri qədər "ağır" vəziyyət mövcuddursa, bu, ilk növbədə onların özlərinin də günahı olmalıdır. Çünki həmin deputatlar özləri elə həmin problemlərin həllini tapmamasında məsuliyyət daşıyırlar.

Ancaq bu açıqlamalar özü də həqiqətə söykənmir. Azərbaycan hökuməti öz xalqının rifahını xüsusi diqqətdə saxlayır. Müharibədə Azərbaycan torpaqlarının bütövlüyü uğrunda döyüşmüş Vətən övladları dövlətin xüsusi qayğısı ilə əhatə olunublar və hər il bu qayğı daha da artırılır, getdikcə daha çoxşaxəli xarakter alır.

Elə Azərbaycan cəmiyyəti üçün də Vətən mövzusu olduqca həssas mövzudur. Azərbaycanın igid övladları xalqın haqlı sevgisini qazanıblar və bu sevgi cəmiyyətimizin bütün dünya üçün nümunə sayılacaq üstünlüklərindən biri olmalıdır. Doğrudur, bütün dünyada Vətən uğrunda vuruşan qəhrəmanlar böyük ehtiram sahibidirlər, ancaq bizim xalqımızda bu sevgi və ehtiram tamamilə fərqli bir səviyyədədir.

Belə olan halda deputatların çıxışının da məhz xalqın bu "sarı sim"inə toxunmağa hesablanmış olduğunu görmək çətin deyil. Ancaq qeyd etdiyimiz kimi, bu toxunuş səmimi deyil və məramı, sadəcə, ucuz şou yaratmaqdır.

Dövlətin sosial sahədə gördüyü tədbirləri, dəstək paketlərini və qayğını öz ucuz şouları xatirinə heçə saymaq cəhdi isə deputat adına sığmayan bir addımdır. Əgər sözügedən deputatlar bu qədər məlumatlı və diqqətlidirlərsə, sual yaranır: indiyə qədər bu istiqamətdə hansı addımları atıblar? Hansı qanun layihələri işləyib-hazırlayıblar? Hansı tutarlı təkliflə çıxış ediblər?

Bu sualın cavabı da elə Siyavuş Novruzovun, Səyyad Aran və Jalə Əliyevanın ötən gün etdikləri çıxışda ortaya qoyduqları "həqiqət" kimi bir heçdir...

Aqil Vəlili