Gəncə şəhər stadionunda yenidənqurma işlərinin dayandırıldığı və işçilərin maaşlarını almadığı ilə bağlı yayılan xəbərlərə klub rəsmiləri tərəfindən aydınlıq gətirilib.
Oxu.Az açıqlama verən "Kəpəz" klubunun baş məşqçisi Adil Şükürov stadionda təmir-tikinti işlərinin tamamilə dayandırıldığını bildirib.
"Bəli, hazırda stadionda heç bir iş görülmür. İlk günlərdə stadionda işlər sürətli irəliləyirdi, daha sonra üç-dörd nəfərlik heyət qaldı. İndi isə maaşlar verilmədiyi üçün təmir işləri tamamilə dayanıb. Kluba 15 milyon manatlıq vəsaitin ayrılması xəbəri barədə isə məlumatım yoxdur. Əgər deyilən bu məbləğ həqiqətən ayrılsa, işçilər təmir işlərini dayandırmazdılar. Bizə də stadionun 2025-2026 mövsümündə təhvil veriləcəyi bildirilib", - deyə Adil Şükürov əlavə edib.
Qeyd edək ki, Azərbaycan Respublikasının Prezidenti İlham Əliyev aprelin 9-da Gəncə şəhər stadionunun təməlini qoyub. Azərbaycan Gənclər və İdman Nazirliyi tərəfindən elan olunan "Gəncə Şəhər stadionunun yenidən qurulması üzrə işlərinin (Birinci mərhələ) satın alınması"tenderin qalibi "İnşaatçı 3" MMC olub. Şirkətlə 15 milyon manat məbləğində müqavilə imzalanıb.
