Bakı metrosunda problem: Sərnişinlər qatardan düşürüldülər

Bakı metrosunda "yaşıl xətt" - "Əhmədli-Dərnəgül" marşrutu üzrə hərəkət edən qatar nasazlıq ehtimalı ilə xətdən çıxarılıb.

Metropolitendən Oxu.Az-a verilən məlumata görə, yaranmış vəziyyətdə sərnişin sıxlığı səbəbindən platformaların ifrat həddə yüklənməsinə yol verməmək məqsədilə zəruri tədbirlər görülür.

Hazırda "28 May" və " Elmlər Akademiyası" stansiyalarında tənzimlənmə və təhlükəsizlik tələblərinin təmin olunması üçün girişlərdə nəzarət-buraxılış tədbirləri gücləndirilib.

Texniki nasazlıq müəyyən edilmiş qatar xətdən çıxarılıb. Əvəzinə xəttə qatar verilib.

18:38

"Bakı metrosunda "yaşıl xətt" üzrə "Əhmədli-Dərnəgül" marşrutu üzrə hərəkət edən qatar "28 may" stansiyasında ikən maşinist nasazlıq ehtimalı ilə qatara sərnişinsiz baxış keçirilməsini tələb edib".

Bu barədə Oxu.Az-a "Bakı Metropoliteni" QSC-dən bildirilib.

"Bu səbəbdən "28 may" stansiyasında sərnişinlər düşürülüb. Qatar xəttə ikən qatara baxış keçirilir. Digər əlavə məlumatları təqdim edəcəyik", - deyə məlumatda bildirilib.

Eyni zamanda, metronun "İçərişəhər" və Nizami stansiyalarında böyük sıxlıq qeydə alınıb.