Rusiya Prezidenti Vladimir Putin Daxili İşlər Nazirliyinin əməkdaşlarına bir sıra qanun pozuntularına görə xarici vətəndaşları müstəqil olaraq ölkədən çıxarmaq hüququ verən qanun imzalayıb.
Oxu.Az xəbər verir ki, bu barədə sənəd hüquqi aktların rəsmi nəşrinin saytında yerləşdirilib.
Yeni tədbirlər qanunun imzalanmasından 180 gün sonra qüvvəyə minəcək. Hələlik əcnəbilərin inzibati qaydada ölkədən çıxarılması barədə yalnız hakimlər və sərhədçilər qərar verə bilərlər.
2024-cü ilin iyununda Dövlət Duması miqrasiya sahəsində nəzarəti gücləndirən qanun layihələri paketini təsdiqləyib. Təklif olunan düzəlişlər polisin səlahiyyətlərini genişləndirib. Xüsusilə, söhbət nəzarət edilən miqrantların reyestrinə daxil edilmiş şəxslərə nəzarətdən gedir.
Polis artıq əcnəbilərin deportasiyasını həyata keçirir ki, bu da izahat yazısının mətnində yazılan inzibati qaydada çıxarılma mexanizminə bənzəyir.
"Federal qanun layihəsi xarici vətəndaşların deportasiyası və inzibati qaydada ölkədən çıxarılması mexanizmlərinin unifikasiyasına və onların ölkədən çıxarılması səlahiyyətlərinin daxili işlər orqanlarında (polis) cəmləşdirilməsinə yönəlib", - deyə qanun layihəsinin izahatında bildirilir.
Rəylər